[Verse 1]
                   
Für mi sälber mir z'erkläre
                     
bin i mal mym Stammboum na
                  
ha vo undre Zweige här e
                       
chly die Nuss probiert z'verstah
                 
wär da alles mir verwandt isch
                     
han i gluegt, us Quelle gschöpft
               
numen eine wo bekannt isch
                    
worde git's: dä hei si gchöpft

[Verse 2]
                       
S'isch dr Gouner Bärnhard Matter
                 
us em Aargou win ig o
                   
wen o nid my Urgrossvatter
                    
Urgrossungglen allwäg scho
                   
dä het da vor hundert Jahre
                    
üsem Gschlächt e Wäg bestimmt
                     
win i jitz ersch ha erfahre
                    
dass eim nüt meh wundernimmt

[Verse 3]
                
Är het i sym Läbe gstohle
                    
was ihm isch id Finger cho
                         
und was nid isch cho ga z'hole
                         
het är gärn d'Müee uf sech gno
                        
isch gar mängisch z'Nacht ydrunge
                     
dür ne Hüenerstall i ds Hus
                        
und isch mit zwo gröikte Zungen
                
und zäh Gulddukate drus

[Verse 4]
                    
Drü- viermal het me ne gfange
                             
het ne ds Gricht i ds Gfängnis gsteckt
                        
aber är, s'isch nid lang gange
                      
het e Fluchtwäg gäng usgheckt
                  
die Diät vo Brot und Wasser
                    
het er ungärn zue sech gno
                           
und het alls dra gsetzt für dass er
                   
in e bessri Beiz isch cho

[Verse 5]
                         
Das het müesse ds Gricht verdriesse
                      
es het zletscht Befähl erla
                         
nid die Gfängnis besser z'bschliesse
                        
nei däm Schelm dr Chopf abzschla
                       
ds halben Aargou isch cho gschoue
                        
win es Schwärt dr oberscht Bitz
                    
vo mym Vorfahr het abghoue
                  
wi vom weichen Ei dr spitz

[Verse 6]
                   
Drumm chan i nüt garantiere
                   
was's us mir no alles git
                      
s'cha no mängs mit mir passiere
                       
denn da spilt d'Vererbig mit
                           
und we dir ds Gfüehl heit dertdüre
                     
chönn nech sicher nüt ebcho
                            
s'chunnt uf ds Mal en Unggle füre
                        
wo dir nüt heit gwüsst dervo
                            
s'chunnt uf ds Mal en Unggle füre
                          
wo dir nüt heit gwüsst dervo