Bim Coiffeur
Text & Musik: Mani Matter

[Verse 1]
                                               
Bim Coiffeur bin i gsässe vor em Spiegel, luege dry
                                                  
Und gseh dert drinn e Spiegel wo ar Wand isch vis-a-vis
                                                  
Und dert drin widerspieglet sech dr Spiegel da vor mir
                           
Und i däm Spiegel widerum dr Spiegel hindefür

[Verse 2]
                                              
Und so geng wyter, s'isch gsy win e lange Korridor
                                                
I däm my Chopf gwüss hundertfach vo hinden und vo vor
                                                     
Isch ufgreit gsy i eier Kolonne, z'hinderscht isch dr Chopf
                                 
I ha ne nümme gchennt, so chly gsy win e Gufechnopf

[Verse 3]
                                                    
My Chopf, dä het sich dert ir Wyti, stellet euch das vor
                                        
Verloren ir Unäntlechkeit vom länge Korridor
                                             
I ha mi sälber hinde gseh verschwinde, ha das gseh
                           
Am heiterhälle Vormittag und wi we nüt wär gscheh

[Verse 4]
                                                   
Vor Chlupf han i mys Muul ufgscperrt, da sy im Korridor
                                         
Grad hundert Müler mit ufgange win e Männerchor
                                             
E Männerchor us mir alei, es cheibe gspässigs Gfüel
                                   
Es metaphysischs Grusle het mi packt im Coiffeurgstüel

[Verse 5]
                                            
I ha d'Serviette vo mer grissen, ungschore sofort
                                                 
Das Coiffeurgschäft verla mit paar entschuldigende Wort
                                                  
Und wenn dir findet i sött e chly meh zum Coiffeur ga
                                        
De chöit dir jitz verstah warum i da e Hemmig ha