[Verse 1]
                              
s'git lüt, die würden alletwäge nie
                               
es lied vorsinge, so win ig jitz hie
                                    
eis singen um kei prys, nei bhüetis nei
             
wil si hemmige hei

[Verse 2]
                                
si wäre vilicht gärn im grund gno fräch
                              
und dänke, das syg ires grosse päch
                                    
und s'laschtet uf ne win e schwäre stei
              
dass si hemmige hei

[Verse 3]
                                           
i weis, das macht eim heiss, verschlat eim d'stimm
                                     
doch dünkt eim mängisch o s'syg nüt so schlimm
                                         
s'isch glych es glück, o we mirs gar nid wei
              
das mir hemmige hei

[Verse 4]
                                    
was unterscheidet d'mönsche vom schimpans
                                      
s'isch nid die glatti hut, dr fählend schwanz
                                         
nid dass mir schlächter d'böim ufchöme, nei
               
dass mir hemmige hei

[Verse 5]
                                      
me stell sech d'manne vor, wenns anders wär
                                
und s'chäm es hübsches meiteli derhär
                                         
jitz luege mir doch höchstens chly uf d'bei
              
wil mir hemmige hei

[Verse 6]
                                       
und we me gseht, was hütt dr mönschheit droht
                                     
so gseht me würklech schwarz, nid nume rot
                               
und was me no cha hoffen isch alei
            
dass si hemmige hei